ئاسایشی نەتەوەیی لە بەرداشی دوو دەزگای هەواڵگرییدا - پرس میدیا

إعلان فوق المشاركات

ئاسایشی نەتەوەیی لە بەرداشی دوو دەزگای هەواڵگرییدا

ئاسایشی نەتەوەیی لە بەرداشی دوو دەزگای هەواڵگرییدا

پرس میدیا 

لە هەرێمی کوردستان دوو دەزگای هەواڵگریی و دوو ئاسایش هەن، هەرچەندە سەرجەمیان لەلایەن حکومەتەوە بودجەیان بۆ تەرخان دەکرێت بەڵام شارەزایان باس لەوە دەکەن کە لە کاتە هەستیارەکاندا هەریەکە لەوانە لە بەرژەوەندی حزبێک کار دەکەن نەک بۆ پاراستی ئاسایشی نەتەوەیی، ئەمەش لە چەند ڕووداوێکی ڕۆژانی ڕابردوودا بە تەواوتی ڕەنگی دایەوە. 

شارەزایان وا پێناسەی ئاسایشی نەتەوەیی دەکەن کە بریتیی بێت لە هەوڵدانی دەزگاکان، بۆ پاراستتنی نەتەوە و نیشتمان لەوەی نەتەوە و دەوڵەتانی تر بتوانن زیانی پێ بگەیەنن، جا زیانەکە لەکاتی شەڕ و ڕووبەڕووبوونەوەدا بێت یان ئۆپەراسیۆنی هەواڵگریی و کردەوەی ئیختیالات و جۆرەهای تر. 

لە چەند ڕۆژی ڕابردوودا عەلی جوانمەردی ڕۆژنامەنوسی کوردی ڕۆژهەڵاتی کوردستان ئاشکرایکرد کەسێک بەناوی مستەفا سەلیمی پێشتر زیندانی سیاسیی بووە و مانگی ڕابردوو لە زیندانێکی سەقز هەڵهاتووە و پەنای هێناوە بۆ هەرێمی کوردستان و لەلایەن ئاسایشەوە دەستگیرکراوە و رادەستی ئێران کراوەتەوە. 

هەرزوو ئەو هەواڵە بڵاوبوویەوە و بە تەواوتی میدیاکانی داگیرکرد، دوای چەند خولەکێکیش چەند کەسایەتییەکی سیاسیی ڕۆژهەڵاتی کوردستان بابەتەکەیان پشتڕاستکردەوە و دواتریش ڕێکخراوێکی مافەکانی مرۆڤی ڕۆژهەڵات، کە بارەگاکەی لە فەرەنسایە هەواڵەکەی بڵاوکردەوە و پشڕاستیکردەوە. 

بەڵام حکومەتی هەرێمی کوردستان لە ڕاگەیەنراوێکدا ئەوەی خستەڕوو ئەگەر ڕووداوێکی وا روویدابێت حکومەت ئاگاداری نەبووە و بڕیاریشدراوە لیژنەیەک بۆ لێکۆڵینەوە لەو ڕووداوە پێکبهێنرێت. 

دوای چەند خولەکێک لەو ڕاگەیەنراوەی حکومەت، ئاسایشی سلێمانی ڕوونکردنەوەیەکی بڵاوکردەوە و ئاماژەی بەوەکردووە کە هیچ داتایەکیان لانییە بەناوی موستەفا سەلیمییەوە تۆمارکرابێت و نە نشینگە و نە ئاسایش ناوی ئەو کەسەی لانییە و هیچ زانیارییەکی لەسەری نییە و کەسێک بەو ناوە نەهاتووەتە سنوری هەرێمی کوردستان. 

جیا لە راگەیەنراوە فەرمییەکان، میدیا سێبەرەکانی سەر بە پارتی دیموکراتی کوردستان دەستیان کرد بە برەودان بە هەواڵەکە و بەشێوەی جیا جیا دەزگا هەواڵگریەکەی سەر بە یەکێتی و ئاسایشی سنوری سلێمانییان پێ تۆمەتبار دەکرد. 

لەبەرامبەردا میدیای سێبەری یەکێتی نیشتمانیی کوردستان چەند دۆسێیەکی هاوشێوەی وروژاند و دەزگا هەواڵگرییەکەی پارتی و ئاسایشی سنوری هەولێر و دهۆکی بەوە تۆمەتبارکرد کە چەند کەسێکی باکووری کوردستانیان ڕادەستی تورکیا کردووەتەوە. 

سەرتیپ جەوهەر، ڕۆژنامەنوس و کادرێکی یەکێتی نیشتمانیی کوردستانە، چەند دۆسیەیەکی بڵاوکردووەتەوە و ئاماژە بەوە دەکات کە پارتی و دەزگا هەواڵگرییەکەی و ئاسایشەکەی چەند کەسێکیان ڕادەستی حکومەتی تورکیا کردووەتەوە کە کەیسی سیاسییان هەبووە و پەنایان بۆ هەرێمی کوردستان هێناوە. 

ڕۆژنامەنوسەکە ئاماژەی بەوەکردووە کە "پارتی چەند کەسێکی لە لایەنگرانی هەدەپە کە لە تورکیاوە پەنایان بۆ هەرێم هێناوە ناردووە بۆ ڕۆژئاوای کوردستان و ڕێگەی نەداوە لە هەولێر بژین". 

باسی لەوەشکردووە کە "ئاسایشی پارتی کەسێکی بە ناوی مەتین دەستگیرکردووە و رادەستی تورکیای کردووەتەوە و دواتریش میدیاکانی تورکیا ئاماژەیان بەوەکردووە کە دەستگیرکردنی مەتین لە ئۆپەراسیۆنێکی هاوبەشی نێوان هەواڵگریی تورکیا و هەرێمدا بووە". 

ڕاستیی و دروستی هەریەک لەو کەیسانە دەبێت دادگا یەکلاییان بکاتەوە و سەرجەمیان بابەتی هەواڵگریین و سەلماندن و ڕاستکردنەوە و خستنەڕوویان کاری میدیا نییە و لە هەر هەوڵێکی لەو شێوەیەدا میدیا دەکەوێتە هەڵەوە و ڕووبەڕووی بەرپرسیارێتی یاسایی دەکرێتەوە. 

بەڵام کۆی ئەو ڕووداوانە ئەگەر لەڕاستییدا ڕوویاندابێت یان تەنها تۆمەتبن، دەبنە مەترسیی بۆ سەر ئاسایشی نەتەوەیی کوردستان و لە کۆی کەیسەکاندا ئەوەی زیانی بەردەکەوێت کورد و تاکی کورد و ئاسایشە نەتەوەییەکەیەتی. 

ژوری هەواڵی دامەزراوەی میدیایی پرس 

ليست هناك تعليقات:

إرسال تعليق

بابەتی پەیوەندی دار

إعلان اسفل المشاركات

ماڵپەڕی پرس میدیا

بەشە سەرەکیەکان

دواین هەواڵ

نموذج الاتصال

الاسم

بريد إلكتروني *

رسالة *

پرس میدیا - Prs Media

پرس ، دامە زراوەیەکی میدیایی پیشەیی ئازادە دەبێتە بڵند گۆ و ئاوێنەی دەنگ و ڕەنگە جیاوازە نەبیستراو و نەبینراوەکان کلتور و فەرهەنگ و هــونــەری نــیـشـتـمـانیـی دەپـارێـزێـت و خـــەمـــی هـەمـیـشەی چەسپاندنی ئاشتی کۆمەڵایەتی و پێکەوە ژیان دەبێت ، پرس میدیا مەبەستیەتی نـەوەی ئـێسـتـاو داهـاتـوی نـیـشـتـمان بە ئاگابێت لـەسـەرجــەم پـرس و پـێشهاتەکانی دەوروبەری دەیەوێت بەزمانێکی بابەتیانە ئەو نەوەیە بدوێنێت

2019 - PRSMEDIA.NET / ALL RIGHT RESERVED ©