ده‌وڵه‌تی عوسمانییەکان - پرس میدیا

إعلان فوق المشاركات

ده‌وڵه‌تی عوسمانییەکان

ده‌وڵه‌تی عوسمانییەکان

پرس میدیا

چۆمان تەقێدین

ده‌وڵه‌تی عوسمانییەکان ، کە ده‌وڵه‌تێکی تورکییه‌ ، ئەم دەوڵەتە لە ناو هەناوی میرنشینی هۆزی قایی سەر بە نەتەوەی ئۆغوزی تورکی (1200_1299ز) دروست بووە کە لە لایەن خانەوادەی قایا بەرێوەبراوە ، و هەروەها خانه‌وادەی عوسمانییەکان سەر بە هۆزی قایی سەر بە نەتەوەی ئۆغوزی تورکی بوون ، نەوەی خانەوادەی قایا ، ئەوە بوو خانەوادەی عوسمانییەکان به‌ سه‌رکردایه‌تی سوڵتان عوسمانی یه‌که‌م کوڕی ئۆرتۆغۆڵ (1299_1324ز) دامه‌زراوە ، له ‌لە ڕێکەوتی (27_7/یولیو_1299) له ‌خاکی ‌ئه‌نادۆڵۆ له ‌وڵاتی تورکیای ئێستە ، و لە دەوڵەتی سەلجووقییەکانی ڕۆم جیابووە ، و هەروەها ده‌وڵه‌تی عوسمانییەکان لە ساڵی (1299ز)ەوە تا وەکو ساڵی (1924ز) نزیکەیی (40) کەس بوونەتە سوڵتان ، کە نزیکەیی (3) کەس لەو سوڵتانانە لە سەردەمی ناکۆکی لە سەر تەختی سوڵتانیییەتی ده‌وڵه‌تی عوسمانییەکان کە لە نێوان ساڵانی (1402_1413ز) دا بووە بە هاوبەشی ده‌وڵه‌تی عوسمانییەکانیان بەرێوەبردووە ، و هەروەها توانی میرنشینه‌ تورک و تورکمانه‌کانی ئه‌نادۆڵۆ له‌گه‌ڵ ده‌وڵه‌تەکەی یەکبخات و بیایانکاتە بەشێک لە دەوڵەتەکەی و ‌دواتر ده‌ستییان کرد به‌ په‌ڵهاوشتن و به‌رفراوان بوونی ده‌وڵه‌ته‌که‌‌ که ‌ئه‌مه‌ش له ‌سه‌ر ده‌ستی هه‌ندێک له‌ سوڵتانه‌کانی ئه‌م ده‌وڵه‌ته‌ به‌دی هات که‌ هه‌ڵستان به ‌داگیرکردنی خاکی وڵاتانی هه‌ر سێ کێشوه‌ری ئاسیا و ئه‌فریقیا و ئه‌وروپا.

لە ساڵی (1320ز) سیستەمی سەدری ئەعزەم واتە سەرۆک وەزیران لە ناوی ده‌وڵه‌تی عوسمانییەکان دامەزرا کە یەکەم سەدری ناوی ئەعزەم عەلادین پاشا (1320_1331ز) بووە ، کە بە سەر بە خانەوادەی چاندرالی سەر بە هۆزی قایی سەر بە نەتەوەی ئۆغوزی تورکی بووە ، و دوایین فلاشە ئیبراهیم پاشای دووەم (1922_1924) بووە کە بە ڕەگەز کورد بووە ، و هەروەها لە ناو ده‌وڵه‌تی عوسمانییەکان نزیکەیی (217) کەس بۆ (293) جار بووەنەتە سەدری ئەعزەم واتە سەرۆک وەزیران ، و کە لەو (217) کەسە ، سەدری ئەعزەم واتە سەرۆک وەزیران ، نزیکەیی (57) کەس کورد و نزیکەیی (44) کەس تورکی کە تێیاندا خانەوادەی چاندرالی هەڵکەوت و نزیکەیی (36) کەس ئەڵبانی کە تێیاندا خانەوادەی کۆرپۆلو هەڵکەوت و نزیکەیی (15) کەس بۆشناکی و نزیکەیی (13) کەس گریک (یۆنان) ی و نزیکەیی (11) کەس کرواتی و نزیکەیی (12) کەس گۆرج (جۆرج) ی و نزیکەیی (8) کەس سڕبی و نزیکەیی (7) کەس چەرکەسی و نزیکەیی (5) کەس بولگاری و نزیکەیی (5) کەس ئەبخازی و نزیکەیی (3) کەس کرواتی و و نزیکەیی (2) کەس عەرەب و نزیکەیی (2) کەس مۆلدۆڤی و نزیکەیی (2) کەس چیچانی و نزیکەیی (1) کەس فارس و نزیکەیی (1) کەس ئەرمەن و نزیکەیی (1) کەس ڕووس و نزیکەیی (1) کەس لازی و نزیکەیی (1) کەس یەهودی (جولەکە) و نزیکەیی (1) کەس تاتاری.

‌له ساڵی (1453ز) هێزه‌کانی سوپای ده‌وڵه‌تی عوسمانییەکان به ‌سه‌رکردایه‌تی سوڵتان مه‌حمه‌دی دووه‌م (1444_1446ز) (1451_1481ز) هێرشیان کرده ‌سه‌ر شاری ئه‌یستانبوڵ (کۆسته‌نتینه‌ی جاران)‌ ی پایته‌ختی ئیمپراتۆریای بێزنتییه‌کان و دوای چل ڕۆژ له‌ گه‌ماڕۆدانی توانی شاره‌که‌ داگیر بکات ، له ‌کاتی داگیرکردنی شاری ئهی‌ستانبۆل (کۆسته‌نتینه‌ی جاران) ‌ژماره‌یه‌کی زۆری خه‌ڵکی بێتاوانی شاره‌که‌ له‌ نێوان نزیکه‌یی (40 بۆ 50) هەزار که‌س ده‌بوو ، که ‌له ‌لایه‌ن سوپای ده‌وڵه‌تی عوسمانییه‌کان ڕه‌شه‌کۆژ کران و له‌گه‌ڵ ژماره‌یه‌کی زۆری سه‌ربازی دوا سوپای ئیمپراتۆریای بێزنتییەکان‌ ، له‌گه‌ڵ کۆژرانی ئیمپراتۆر کۆسته‌نتینی یازده‌هه‌م (بالیولوگۆس) (1448_1453ز) دوا ئیمپراتۆری ئیمپراتۆریای بێزنتییه‌کان ، به‌م شێوه‌یه‌ ئیمپراتۆریای بێزنتییەکان‌ کۆتایی پێهات و هه‌روه‌ها شاری ئه‌یستانبوڵ (کۆسته‌نتینه‌ی جاران) ی کرده‌ دوایین پایته‌ختی ده‌وڵه‌ته‌که‌ی.

دەوڵەتی عوسمانییەکان هەر لە سەرەتای دامەزراندنییەوە تاوەکو داگیر کردنی شاری ئه‌یستانبوڵ (کۆسته‌نتینه‌ی جاران) ی پایته‌ختی ئیمپراتۆریای بێزنتییه‌کان ، نزیکەیی سێ پایتەختی هەبووە ، کە یەکەم پایتەختی دەوڵەتی عوسمانییەکان شارۆچکەی سۆگۆتی سەر بە پارێزگای بیلەجک بووە ، لە نێوان ساڵانی (1299_1335ز) و دواتر شاری بۆرسای ناوەندی پارێزگای بۆرسا لە نێوان ساڵانی (1335_1363ز) و پاشان شاری ئێریرنە (ئەدریانۆپل) ی ناوەندی پارێزگای ئێریرنە (ئەدریانۆپل) لە نێوان ساڵانی (1363_1453ز) دا بووە و دوایین پایتەختی دەوڵەتی عوسمانییەکان شاری ئه‌یستانبوڵ (کۆسته‌نتینه‌ی جاران) ی پایته‌ختی ئیمپراتۆریای بێزنتییه‌کان بووە ، لە ساڵی (1453ز)ەوە تاوەکو ساڵی (1924ز).

هه‌ر یه‌کێکه‌ له‌ سوڵتان سه‌لیم یه‌که‌م (یازوه‌ر) (1512_1520ز) کە لە ساڵی (1517ز) نازناوی خەلیفەی بۆ خۆی زیاد کرد ، ئەوەش پاش ئەوە دێت کەوا دوایین خەلیفەی دەوڵەتی خەلافەتی دووەمی عەباسییەکان خەلیفە مەتوەکیلی چوارەم (1508_1516ز) (1517) خەلافەتی ڕادەستی سوڵتان سه‌لیم یه‌که‌م (یازوه‌ر) (1512_1520ز) کرد و ناوی دەوڵەتی عوسمانییەکان لەو کاتەوە بوو بە دەوڵەتی خەلافەتی عوسمانییەکان ، و سوڵتان سه‌لیم یه‌که‌م (یازوه‌ر) (1512_1520ز) بووە یەکەم خەلیفەی دەوڵەتی عوسمانییەکان ، و هەروەها سوڵتان سلێمانی یه‌که‌م (قانونی) (1520_1566ز) و ‌هه‌ندێک له‌ سوڵتانه‌کانی تر دوه‌ریان کاریگەریان گێرا له‌ سه‌رکه‌وتن و په‌ڵهاویستنی ده‌وڵه‌تی عوسمانییەکان ، و به‌ڵام دواتر ده‌وڵه‌تی عوسمانییەکان به‌ره ‌به‌ره‌ لاواز ده‌بوو ، و ‌هه‌رچه‌نده‌ ده‌ستیان کرد به ‌چاکسازی بۆ دووباره‌ هه‌ڵستانه‌وه‌ و بۆژاندنه‌وه‌ی ده‌وڵه‌ته‌که‌یان وه‌کو چاکسازییه‌کانی سوڵتان مه‌حمودی دووه‌م (1808_1839ز) که‌ زیاتر چاکسازییه‌که‌ له ‌بواری سوپاییدا بوو ، چونکه‌ سوپای عوسمانییەکان له‌ جه‌نگه‌کانی دژی ده‌وڵه‌ته ‌ئه‌وروپییه‌کان شکستی هێنا که ‌توانیان کۆتایی بهێنن به بوونی ‌سوپای ئینکیشاری و ‌دامه‌زراندنی سوپای هاوچه‌رخ له سەر ‌شێوازی ده‌وڵه‌ته‌ ئه‌وروپییه‌کان به‌ڵام تووشی به‌ره‌نگار بوونه‌وه‌ی ناوخۆیی هات ، و ‌له‌گه‌ڵ چه‌ند ڕاگه‌یاندراوه‌یه‌ک به‌ ناوه‌کانی خه‌تی شه‌ریفی گوڵخانه له‌ ساڵی (1839ز) و خه‌تی هۆمایون له ‌ساڵی (1856ز) له ‌سه‌رده‌می سوڵتان عه‌بدوڵمه‌جیدی یه‌که‌م (1839_1860ز) به‌ مه‌به‌ستی چاکسازی له ‌ده‌وڵه‌تی عوسمانییەکان به‌ڵام نه‌توانی ده‌وڵه‌ته‌که‌ له‌ کێشه ناوخۆیی و ‌ده‌ره‌کییه‌کان رزگار بکات.

‌ دەوڵەتی خەلافەتی عوسمانییەکان کۆمه‌ڵێک په‌یماننامه‌ له‌گه‌ڵ ده‌وڵه‌ته‌کانی ئێران بۆ په‌یوه‌ندی نێوانیان و دابه‌ش کردنی خاکی کوردستان له ‌نێوانیان دژایه‌تی کردنی کوردستانیان و ‌کۆتایی هێنان به ‌ده‌سه‌ڵات و میرنشینه‌ خۆجێیه‌کانی کورد له ‌سنووری هه‌ر دوو ده‌وڵه‌ته‌که‌ ، وه‌کو په‌یماننامه‌کانی ئه‌ماسیا لە ساڵی (1555ز) ،و ڕێکخستنی سنوور (زه‌هاو) لە ساڵی(1639ز) و ئه‌رزیڕرۆمی یه‌که‌م لە ساڵی (1823ز) و ئه‌رزیڕۆمی دووه‌م لە ساڵی(1847ز) واژۆ کردووە ، و هەروەها ئەنجام دانی دەیان شەڕ و جەنگ لە گەڵ دەوڵەتە ئێرانییەکان و دەوڵەتە ئەوروپییەکان و ئیمپراتۆریای ڕووسیای قەیسەری ، و هەروەها ‌بە دەیان چه‌ندان ڕێکه‌وتننامه‌ و په‌یماننامه‌ له‌گەڵ ده‌وڵه‌ته‌ ئه‌وروپپیه‌کان و ئیمپراتۆریای ڕووسیای قەیسەری ، واژۆ کردووە.

لە ناو چوارچێوەی دەوڵەتی خەلافەتی عوسمانییەکان له ‌نێوان ساڵی (1894_1897ز) نزیکەیی (300.000) کەس ، و هەروەها لە نێوان ساڵانی (19151923_ز) دا ، نزیکه‌یی (1.500.000) ئه‌رمه‌نییەکان کۆمه‌ڵکۆژکران له ‌لایه‌ن ده‌وڵه‌تی عوسمانییەکان ، و هەروەها کۆمەڵکۆژ کردنی نزیکەیی (750.0000) کەس تا نزیکەیی (1.110.000) کەس لە نەتەوەی گریک (یۆنان) ، و کۆمەڵکۆژ کردنی نزیکەیی (250.000) کەس تا نزیکەیی (500.000) کەس لە نەتەوەی کلدۆئاشوور کە بە جینۆسایدی سیڤۆ ناسراوە ، و هەروەها کۆمه‌ڵکۆژ کردنی بەردەوامی کوردان که ‌له ‌ژماره‌ی کۆمه‌ڵکۆژه‌کراوه‌‌کانی نه‌ته‌وه‌ی ئه‌رمه‌نییەکان زیاتر بووە.

ده‌وڵه‌تی عوسمانییەکان کە ده‌وڵه‌تێکی تورکی بووە‌ ، لە ڕووی دابەشی کارگێرییەوە لە سەرەتاوە تاوەکو ساڵی (1867ز) بریتی بوو لە نزیکەیی (47) ئیالەت و لە دوای ساڵی (1867ز) دووبارە ده‌وڵه‌تی عوسمانییەکان لە ڕووی کارگێری ڕێکخرایەوە ، و دەوڵەتە دابەش کرا بە سەر نزیکەیی (34) ویلایەت و (2) موتەرسیف ، کە نزیکەیی (8) ویلایەت زۆرینە کورد بوون ، و هەروەها تا ساڵی (1914ز) نزیکەیی (11) ویلایەت لەو دەوڵەتە داگیر کران و نزیکەیی (23) ویلایەت و (2) موتەرسیف لەگەڵ ده‌وڵه‌تی عوسمانییەکان مانەوە.

‌ده‌وڵه‌تی عوسمانییەکان له ‌پاڵ ئیمپراتۆریای ئەڵمانیا و ئیمپراتۆریای نەمسا_مەجەر(هەنگاریا) و شانشینی بولگاریا ‌به‌شداری جه‌نگی یه‌که‌می جیهانیدا کرد که‌ له ‌ئه‌نجامدا ‌ده‌وڵه‌تی عوسمانییەکان تووشی دۆراند هات له ‌به‌رامبه‌ر هێزه‌کانی ده‌وڵه‌ته‌کانی هاوپه‌یمانان (ئیمپراتۆریای بەریتانیای مەزن و کۆماری فەرەنسای سێیەم و ئیمپراتۆریای ڕووسیای قەیسەری و شانشینی ئیتاڵیا و دواتر ویلایەتە یەکگرتووەکانی ئەمریکا) و ‌ئه‌وانیش که‌وتنه‌ پارچه ‌پارچه‌ کردنی ده‌وڵه‌ته‌که‌ به ‌پێی به‌رژه‌وه‌ندییه‌کانی خۆیان که‌ له ‌ئاکامدا چه‌ندان ده‌وڵه‌تیان له ‌ناوچه‌که‌ دورست کرد که ‌پێشتر سه‌ر به ‌ده‌وڵه‌تی عوسمانییەکان بوون به‌ڵام وڵاتانی هاوپه‌یمانان هه‌رچه‌نده‌ به ‌پێی په‌یماننامه‌ی سیڤه‌ری ساڵی (1920ز) به‌لێنی دورستکردنی ده‌وڵه‌تێکی کوردییان دا به‌ڵام به ‌پێی په‌یماننامه‌ی لۆزانی ساڵی (1924ز) پاشگه‌ز بوو له‌و به‌ڵێنه‌یان که‌ به‌ڵێنی ‌به‌رامبه‌ر دامه‌زراندنی ده‌وڵه‌تی کوردی و ‌کوردستان به‌ سه‌ر هه‌ر سێ وڵاتی تورکیا و عێراق و سوریا دابه‌ش کرد و ‌به‌ڵام خۆرهه‌ڵاتی کوردستان هه‌ر وه‌کو خۆی مایه‌وه‌ واته‌ هه‌ر له ‌ده‌ستی ئێراندا مایه‌وه‌ ، و ‌له‌ ڕێکەوتی (3_3/ئازار_1924) له ‌سه‌ر ده‌ستی مه‌سته‌فا که‌مال ئه‌تاتۆرک (1923_1938ز) یەکەم سەرۆک کۆماری تورکیا ، ده‌وڵه‌تی عوسمانییەکان کۆتایی پێهات ، کە ئەو دەوڵەتە نزیکەیی (624) ساڵ و (7) مانگ و (7) ڕۆژ فەرمانڕەوایی کردووە.

له‌ ساڵی (1683ز) ڕووبه‌ری ده‌وڵه‌تی عوسمانییەکان گه‌یشتبووه‌ نزیکه‌یی (5.200.000) کیلۆ مه‌تر چوار گۆشه‌‌‌ واتا نزیکه‌یی (3.400.000) کیلۆ مه‌تر چوار گۆشه‌ی له ‌ده‌ست دابوو ، که ‌ئه‌و ڕووبه‌ره‌ش زۆربه‌ی خاکی وڵاتی عه‌ره‌بی و وڵاتی ناوچه‌ی به‌ڵکانی ئه‌وروپا بوو ، واتا به‌ر له ده‌ستپێکی جه‌نگی یه‌که‌می جیهانی له‌ ساڵی (1914ز) ڕووبه‌ری ئه‌م ده‌وڵه‌ته‌ نزیکه‌یی (1.988.540) كيلۆ مه‌تر چوار گۆشە بووە ، و ‌هه‌روه‌ها هه‌ر به‌ر له ‌ده‌ستپێکی هه‌مان جه‌نگه‌که‌ دانیشتوانی ئه‌م ده‌وڵه‌ته‌ نزیکه‌یی (40.000.000) که‌س بوو که‌ دابه‌ش ببوو به‌ سه‌ر چه‌ندان نه‌ته‌وه‌ به‌م شێوه‌یه‌:



1_عه‌ره‌ب 18.600.000 که‌س 46.5%.

2_تورک 10.000.000 که‌س 25%.

3_بولگار و یوماق 3.000.000 که‌س 7.5%.

4_ئه‌ڵبان 1.800.000 که‌س 4.5%.

5_بۆشناک و سرب 1.600.000 که‌س 4%.

6_کورد (بێ خۆرهه‌ڵاتی کوردستان) 1.600.000 که‌س 4%.

7-_ڕۆم (قه‌ره‌ج) 1.200.000 که‌س 3%.

8_ئه‌رمه‌ن 1.000.000 که‌س 2.5%.

9_ئۆلاخ 400.000 که‌س 1%.

10_یه‌هوود (جوله‌که‌) 400.000 که‌س 1%.

11_چه‌رکه‌س (ئادیگی) 200.000 که‌س 0.5%.

12_نه‌ته‌وه‌کانی تر 200.000 که‌س 0.5%.


سه‌رچاوه‌کان

1_ئۆرخان مه‌حمه‌د عه‌لی: چه‌ند لاپه‌ڕه‌یه‌کی ڕه‌نگین له ‌مێژووی عوسمانی -وه‌: فاروق ڕسول یەحیا -هه‌ولێر1998ز.

2_نه‌جاتی عه‌بدوڵڵا: کوردستان و کێشه‌ی سنووری عوسمانی_فارسی (1639-1847ز)-هه‌ولێر2001ز.

3_نۆیل باربه‌ر: فه‌رمانڕه‌واییانی قۆچ زێرین (له ‌سوڵتان سلێمانی قانوونییه‌وه‌ تا ئه‌تاتورک)-وه‌: رێبوار که‌ریم وه‌لی-هه‌ولێر2001ز.

4_د . عه‌بدوڵڵا عه‌لیاوه‌یی: کوردستان له ‌سه‌رده‌می ده‌وڵه‌تی عوسمانیدا-سلێمانی2004ز.

5_د . فه‌یسه‌ڵ ده‌باغ: کوردستان له ‌چاپکراوه‌ عوسمانلییه‌کاندا-هه‌ولێر2004ز.

6_رۆهات ئه‌لاکۆم: کوردانی ئه‌سته‌مووڵی کۆن-وه‌: ئه‌حمه‌د تاقانه‌-هه‌ولێر2005ز.

7_عه‌لی که‌ندی: فه‌رهه‌نگی ڕووداوه‌کانی کوردستان و وڵاتانی جیهان-هه‌ولێر2005ز.

8_یاسین صابر صاڵح: ئینسایکلۆپیدیای گشتی -سلێمانی2005ز.

9_حه‌سه‌ن ئه‌رفه‌ع: کورده‌کان-وه‌: حامید گه‌وهه‌ری-هه‌ولێر2007ز.

10_د . عبدالرحمان قاسملوو: کوردستان و کورد-وه‌: عبدالله‌ حه‌سه‌ن زاده‌-2007ز.

11_د . فه‌رهاد پیرباڵ: سوڵتانی عوسمانییه‌کان (سوڵتانه‌کانی ئیمپراتۆریای عوسمانی)-سلێمانی2007ز.

12_کۆمه‌ڵێ نووسه‌ر: عوسمانییه‌کان (له ‌عوسمانی کوڕی ئۆرتغله‌وه‌ بۆ سوڵتان عه‌بدولحه‌میدی دووه‌م)-وه‌: سه‌لام عه‌بدولکه‌ریم- سلێمانی2007ز.

_13 شه‌مس دین سامی: کورد و کوردستان له ‌قامووسولئه‌علامدا-وه‌: ئه‌حمه‌د تاقانه - هه‌ولێر2008ز.

14_که‌مال بورکای: کورد و کوردستان-وه‌: عه‌لی فه‌تحی-هه‌ولێر2008ز.

15_مانه‌ند ڕۆژه‌: ئه‌رمۆساید-سلێمانی2008ز.

16_بێ نووسه‌ر: به‌نده‌کانی کۆنگره‌ی سیڤه‌ر و خوێندنه‌وه‌یه‌کی تر-وه‌: سه‌لام ناخۆش-هه‌ولێر2009ز.

17_فه‌رید ئه‌سه‌سه‌رد: ئه‌تڵه‌سی سیاسی هه‌رێمی کوردستان (1914_2005ز)-سلێمانی2010ز.

18_د . فه‌رهاد پیرباڵ: کرۆنۆلۆجیای کوردستان625پ.ز_1932ز- هه‌ولێر2011ز.

19_ن . لازایف: مێژووی کوردستان-وه‌: وشیار عه‌بدوڵڵا سه‌نگاوی-هه‌ولێر2012ز.

20_بێرنارد لویس: ڕۆژهه‌ڵاتی ناوه‌ڕاست-وه‌: عه‌بدوڵڵا ڕه‌سولی-هه‌ولێر2014ز.

21_د . موفید زەیدی: ئینسایکلۆپیدیای مێژووی ئیسلام/ سەردەمی عوسمانییەکان-وە: بەختیار عەزیز ئەحمەد-سلێمانی2015ز.

22_د . محەمەد تەقوش:عوسمانییەکان/ لە دامەزراندنی دەوڵەتەوە تا کودەتا بە سەر خەلافەتەدا-وە: نەریمان خۆشناو و مەستەفا سەید مینە-هەولێر2015ز.

22_کارڵ برۆکلمان: مێژووی گەلانی موسڵمان-وە: عومەر عەلی غەفوور-تاران2017ز.

23_د . هیوا حەمید شەریف: کوردە عەلەوییەکانی باکووری کوردستان1938_1908-هەولێر2020ز.

No comments:

Post a comment

بابەتی پەیوەندی دار

إعلان اسفل المشاركات

ماڵپەڕی پرس میدیا

بەشە سەرەکیەکان

دواین هەواڵ

Contact form

Name

Email *

Message *

پرس میدیا - Prs Media

پرس ، دامە زراوەیەکی میدیایی پیشەیی ئازادە دەبێتە بڵند گۆ و ئاوێنەی دەنگ و ڕەنگە جیاوازە نەبیستراو و نەبینراوەکان کلتور و فەرهەنگ و هــونــەری نــیـشـتـمـانیـی دەپـارێـزێـت و خـــەمـــی هـەمـیـشەی چەسپاندنی ئاشتی کۆمەڵایەتی و پێکەوە ژیان دەبێت ، پرس میدیا مەبەستیەتی نـەوەی ئـێسـتـاو داهـاتـوی نـیـشـتـمان بە ئاگابێت لـەسـەرجــەم پـرس و پـێشهاتەکانی دەوروبەری دەیەوێت بەزمانێکی بابەتیانە ئەو نەوەیە بدوێنێت

2019 - PRSMEDIA.NET / ALL RIGHT RESERVED ©