خۆپیشاندانەكەی (12)ی مانگ ‌و بێباكی حكومەت! - پرس میدیا

إعلان فوق المشاركات

 خۆپیشاندانەكەی (12)ی مانگ ‌و  بێباكی حكومەت!

خۆپیشاندانەكەی (12)ی مانگ ‌و بێباكی حكومەت!

پرس میدیا

مەلا بەختیار

12/8/2020 كاتژمێر 5/ی ئێوارە، لەسەر داوای شاسوار عەبدولواحید، خۆپیشاندان لە پاركی ئازادی سلێمانی‌و لە رانیەو شارۆچكەی دیكەش كرا. ژمارەی خۆپیشاندەران، زیاتر بون لە خۆپیشاندانەكەی پێشووی پاركی ئازادی، كە هەر شاسوار بانگەوازی بۆ كرد.


لە خۆپیشاندانەكەی پێشوودا، رەفتاری نەشیاو بەرامبەر شاسوار عەبدولواحید، نوێندرا، كە دوور بوو لە گیانی دیموكراسی. لەم خۆپیشاندانەدا، حكومەت لە رانیە ناچار بوو هێزی ئاسایش‌و تەقەی بەكارهێنا! خۆپیشاندەرانیش، هەڵەی خراپیان كرد كە پەلاماری بارەگای گۆڕان‌و یەكێتییان دا. هەر دوێنێ‌، بانگەوازی خۆپیشاندانی بەردەوام راگەیەندرا، هەتا بگاتە راپەڕین! بەدەر لەوەی شاسوار، ئەزمونی سیاسی نییەو رەمزێكیش نەبووە، بەڵام ئەوەی دەبینرێ‌.. لە رەمزە سیاسییەكان‌و لایەنەكان، زیاتر چۆتە ناو شەپۆلی ناڕەزاییەكان.

هەر لەم كاتەدا، یەكێتی‌و پارتی 11/ی مانگ راگەیەندراوی هاوبەشیان دەركردو دوورونزیك، دڵنیاییان بۆ چارەسەركردنی قەیرانی دارایی، لەپێشەوەدا، گێڕانەوەی پارەی دزراوی گومرگەكان‌و شیرینی نەوت‌و نەوتی قاچاخ، نەدایە خەڵكەكە.


دوێنێش، حكومەتی هەرێم رونكردنەوەی لەسەر گفتوگۆی هەولێرو بەغداد، سەبارەت بە شایستە داراییەكان دەركردو دەستبەجێ‌، بەغداد وەڵامی دانەوەو بەپرسیارێتیەكەی خستە سەر حكومەتی هەرێم.. بەتایبەتی لە رادەست نەكردنی گومرگەكان.


لە كۆبونەوەكانی حكومەتی هەرێمیشدا، بگرەو بەردە لەسەر دابینكردنی موچە، كەمكردنەوەی موچە، چۆنیەتی دابینكردنی موچە هەیەو ئاسۆ.. تاریكە!
جگە لە هەموو ئەو راستیانە.. دۆخی رۆژهەڵاتی ناوەڕاست‌و دەوڵەتانی ئیقلیمیش.. سەرەتاكانی مەترسییان لەسەر چارەنوسی هەرێم‌و كوردستان دەركەوتووە.. ئەگەری ئەوە لەئارادا هەیە، كە سەرەنجامی ئەم قەیرانە دارایی‌و سیاسی‌و ئاساییشەی دنیاو رۆژهەڵاتی ناوەڕاستی گرتۆتەوە، بۆ جۆرێك لە چارەسەری سیاسی-ئابوری-ئاساییشی ئەوتۆ لەپشتی پەردەی بەرژەوەندیەكاندا، بگەڕێن‌و تیایدا.. زلهێزەكان لەگەڵ دەوڵەتە ئیقلیمیەكان لەنێوان خۆیاندا رێك بكەون.. كە مێژوو پێماندەڵێ‌، رێكەوتنی گەرمەی قەیران‌و مەترسیەكان، سەرەنجامەكەی، حكومەتە دیكتاتۆرەكان لەسەر حسابی ماف‌و خەباتی گەلان، دەپارێزرێن‌و دەسەپێنرێن!!

هەفتەی رابوردوو، ئەیهودی عاری، پسپۆڕی شارەزای ئیسرائیل، لە كەناڵی 12/ی ئیسرائیلدا، گوتی: بەهۆی گەندەڵی، دوو ئیدارەیی، شەڕی فەیسبوك، زاڵی دوو بنەماڵەی بارزانی‌و تاڵەبانی‌و دوو لەشكریەوە، خەونی كورد تێكشكاوەو گوتیشی: لەوانەیە ئیتر ئەمریكا، متمانە بە حكومەتی كورد نەكات‌و تەنانەت باشترین هاوڕێكانیان نەتوانن هاوكارییان بكەن.

هەر ئەم هەفتەیە خانمە رۆژنامەنوسی هۆڵەندی (جودیت نیورینك) كە (10) ساڵە لە كوردستانەو دۆستی راستگۆی كوردە، لە بەشێكی وتارێكدا دەنوسێ‌:

"ئاواتی كوردەكانی عێراق بۆ گەیشتن بە ژیانێكی شایستە لە رووی ئابوری‌و سیاسییەوە لەناوچووەو وا هەست دەكەن فریویان خواردووە، نزیكن لەوەی بەتەواوەتی هیوای خۆیان لەدەست بدەن".

لەبەرامبەر ئەو روداوانەدا.. دەبێ‌ لەخۆمان بپرسین:

ئایا، دەستەبەرێك لەعێراقدا هەیە، پیلانێك دژی هەرێم، لەئارادا نەبێ‌، ئەگەر دوچاری روداوی نەخوازراویش نەكرێ‌.. بەڵام ئایا مەترسی ئەوە نییە ناچاری پاشەكشەی چاوەڕوانەكراو، بكرێ‌!!

لەم دۆخەی ناوچەكە، عێراق، كوردستان، هێزە سیاسیەكان، حكومەتی هەرێم‌و توڕەیی لەڕادەبەدەری جەماوەردا، حكومەت بەم بێباكیە بەرامبەر تاڵانكردنی گومرگەكان‌و نادیاری داهاتی شیرینی نەوت‌و نەوتی دزراو، هاوكات سەرسەختی حكومەتی كازمی بۆ چارەسەركردنی شایستە داراییەكان (كە ئەوان حكومەتی هەرێم.. بە راست‌و درۆ دەكەنە پاساو) ئایا، ئەم دۆخە سیاسی-ئابورییە.. نیشانەی سەرەتاكانی لە گرێژنە دەرچونی هەلومەرجی بابەتی نییە؟

هەلومەرجی بابەتی.. ماناكەی رون‌و رۆشنە، ئەویش ئەوەیە، كە حكومەت توانای چارەسەركردنی قەیرانی نەمابێ‌‌و خەڵكیش بە چارەسەرە نیوەچڵەكانی حكومەت رازی نەبێ‌.. كە حكومەت توانای چارەسەركردنی قەیرانی نەماو خەڵكیش پشووی بگاتە كۆتایی.. ئیتر دۆخی شۆرشگێڕانەی گۆڕانكاری دەخوڵقێ‌.. لەم سەردەمەشدا، دەركەوت بەبێ‌ حیزبێكی مێژویی بەهێزیش.. حكومەتەكان دەگۆڕدرێن.

بەندە.. مەرگی خۆمم پێ خۆشترە، لە روخاندنی حكومەتی هەرێم.. وەكو حكومەتی خەڵك.. حكومەتێك، بەڕاستی بتوانێ‌ تەنگوچەڵەمەكان چارەسەر بكات‌و ژیانی مەدەنی پێشبخات.. نەك دەستەپاچە بێ‌ بەرامبەر كێشەكان، تەنانەت نەتوانێ‌ گەندەڵكارە رسواكانیش سزا بدات!
بێباكی لەم دۆخە مەترسیدارەدا، ترسناكە.

بەداخەوە، حیزبەكان.. هەر خەریكی حیزبایەتی گۆشەگیرن.. هەر خەریكی دەستەگەری‌و پیلانگێڕانن. خەریكی شەڕە پەیج‌و فەیسبوك‌و پیاهەڵدان‌و پاساوهێنانەوەن بۆ شكست‌و شەرمەزایەكان.

لەگەڵ هەموو جیاوازی‌و رەخنەكانم لە پارتی.. لە شێوەی حوكمڕانیەكەی.. بەڵام نایشارمەوە، لەم دۆخەدا، تەنها كاك مەسعود بارزانی دەتوانێ‌، كۆنگرەیەكی كوردستانی بۆ: حیزبەكان، رێكخراوەكان، پسپۆڕەكان، سازبدات‌و بەرپرسیارێتی چارەسەركردنی قەیرانەكان، لەناو كۆنگرەكەدا.. دیاری بكرێ‌.. بەمەرجێ‌ تەواوی بڕیارەكانی جێبەجێ بكرێ‌. نەك كۆنگرە بۆ دەستخەڕۆكردنی رای گشتی!!

ئەگەر، بەرێز مەسعود بارزانیش، بەم پێشنیازو پەرۆشییە رازی نەبێ‌.. داوام وایە كە:

- یان حكومەتی هەرێم رێگای شیاوتر بۆ رێكەوتن لەگەڵ بەغداد بدۆزێتەوە.

- یاخود، رادیكاڵانە.. داهاتی گومرگەكان‌و نەوتی دزراو.. كۆنترۆڵ بكات‌و بۆ حكومەتی بگێڕێتەوە.. هەتا فریای موچەی خەڵك بكەوون.

بێباكی.. ناكاتە ئەستۆپاكی. بەڵكو بێباكی لای خەڵك وا لێكدەدرێتەوە، كە تاڵانی‌و گەندەڵی.. دادەپۆشرێ‌.. شۆڕەسوارەكانی گەندەڵیش.. یەك بە یەك، لە ویژدانی خەڵكدا ناسراوون. تەنها هەلپەرست‌و مشەخۆرەكان، پارەیان بۆ دادەدۆشن‌و دادەپۆشن!!

ليست هناك تعليقات:

إرسال تعليق

بابەتی پەیوەندی دار

إعلان اسفل المشاركات

ماڵپەڕی پرس میدیا

بەشە سەرەکیەکان

دواین هەواڵ

نموذج الاتصال

الاسم

بريد إلكتروني *

رسالة *

پرس میدیا - Prs Media

پرس ، دامە زراوەیەکی میدیایی پیشەیی ئازادە دەبێتە بڵند گۆ و ئاوێنەی دەنگ و ڕەنگە جیاوازە نەبیستراو و نەبینراوەکان کلتور و فەرهەنگ و هــونــەری نــیـشـتـمـانیـی دەپـارێـزێـت و خـــەمـــی هـەمـیـشەی چەسپاندنی ئاشتی کۆمەڵایەتی و پێکەوە ژیان دەبێت ، پرس میدیا مەبەستیەتی نـەوەی ئـێسـتـاو داهـاتـوی نـیـشـتـمان بە ئاگابێت لـەسـەرجــەم پـرس و پـێشهاتەکانی دەوروبەری دەیەوێت بەزمانێکی بابەتیانە ئەو نەوەیە بدوێنێت

2019 - PRSMEDIA.NET / ALL RIGHT RESERVED ©