یەکێتی و پارتی دەیان خۆپیشاندەریان دەستگیرکردووە - پرس میدیا

إعلان فوق المشاركات

یەکێتی و پارتی دەیان خۆپیشاندەریان دەستگیرکردووە

یەکێتی و پارتی دەیان خۆپیشاندەریان دەستگیرکردووە



پرس میدیا – راپۆرت 

کۆتایی هەفتەی رابردوو بەشێک لە شارەکانی هەرێمی کوردستان ژمارەیەک خۆپیشاندانی پچڕ پچڕیان تێدا روویدا بەهۆیەوە دەیان خۆپیشاندەر دەستگیرکران کە تا ئێستاش ژمارەیەکیان ئازاد نەکراون. 

خۆپیشاندەران لە دروشمەکانیاندا داوای رووخاندانی حکوومەت و دوورکەوتنەوەی ئەو بەرپرسانە دەکەن کە لە ماوەی ٣٠ ساڵی رابردوودا ئیدارەی حکوومەتی هەرێمی کوردستانیان داوە. 
خۆپیشاندانەکان زیاتر پارێزگای سلێمانی و ئیدارەی ڕاپەڕینی گرتەوە و دواتر بۆ دهۆک و زاخۆ گوازرانەوە. 

زۆنی زەرد ئەزموونی خۆپیشاندان تاقی دەکاتەوە 

بە درێژای مێژووی حکوومەتی هەرێم، تا ئێستا لە زۆنی زەردا خۆپیشاندان دژی حکوومەت و بەدیارییکراوی دژی پارتی دیموکرات ئەنجام نەدراوە، یان بە دەستەواژەیەکی دروستتر رێگە نەدراوە ئەنجام بدرێت، هەر جوڵانەوەیەک بەو ئاڕاستەیە روویدابێت هێزە ئەمنییەکانی پارتی لە ئاسایش و هێزەکانی پاراستن راستەوخۆ کاردانەوەی توندیان نیشانداوە. 

بەڵام لە کابینەی نۆیەمدا کە مەسروور بارزانی سەرۆکایەتی دەکات خۆپیشاندان لە زۆنی زەردا ئەزموون دەکرێت، بە جۆرێک کە خۆپیشاندانی لەوشێوەیە تەنها لە سنووری زۆنی سەوزدا روویداوە. 

یەکەم خۆپیشاندانی دانیشتوانی زۆنی زەرد خۆپیشاندەرانی مامۆستایانی ئەو پارێزگایە بوون کە دژی دابەشنەکردنی مووچەکانیان هاتنە سەر شەقامەکان و دروشمی توندیان دژی حکوومەت وتەوە. 

خۆپیشاندەرە مامۆستاکان ژمارەیەکی بەرچاویان لێ دەستگیرکرا و دوای نزیکەی مانگێک ئازاد کران. 

بە دوای خۆپیشاندانی مامۆستایاندا، لە قەزای زاخۆ خۆپیشاندانێکی فراوان دژی حکوومەت بەڕێوەچوو هەر زوو هێزە ئەمنییەکانی پارتی کەوتنە فەلاقە کردنی خۆپیشاندەران پاشان دەستیان کرد بە تەقەی هەڕەمەکی. 

تا ئێستا ئامارێکی ورد و دروست لەسەر بریندارانی خۆپیشاندەرانی زاخۆ دەست هیچ لایەنێک نەکەوتووە بەو پێیەی رێگە بە هیچ دەزگایەکی راگەیاندن نەدرا رووماڵی ئەو خۆپیشاندانە بکات، لەگەڵ ئەوەشدا تەواوی راگەیاندن کار و رۆژنامەنوسانی سنوورەکە کە سەر بە هێزە ئۆپۆزسیۆنەکان بوون دەستگیرکران، جگەلەوە هەر خۆپیشاندەرێک لە چاوی کامێراکانی چاودێریی ئاسایشی پارتیەوە دەرچووبێت دەستگیرکرا. 


ئاسایشی پارتی چەند کەسی دەستگیرکردووە؟ 
لەیەکەم رۆژی دوای خۆپیشاندانەکەی زاخۆ، هەڵمەتی رەشبگیری لەلایەن هێزەکانی پاراستن و ئاسایشی پارتی لە سنووری زاخۆ و دهۆک دەستی پێکرد، بەپێی زانیارییەکانی پرس میدیا کە لە چەند چالاکوانێکی ناوچەکەوە دەستی کەوتووە زیاتر لە ٢٠٠ کەس بە تۆمەتی بەشداری لە خۆپیشاندانەکان دەستگیرکراون. 

ئەو کەسانەی لەلایەن هێزەئەمنییەکانی پارتیەوە دەستگیرکران بۆ چەند بەشێک پۆلێن کران ئەوانەی بە تەنیا بەشداری خۆپیشاندانەکانیان کردبوو لە رۆژی یەکەم تا رۆژی سێهەم بەشێکیان ئازاد کران. 

ئەوانەی لە دیمەنەکاندا دەرکەوتبوون کە توندوتیژیان بەرانبەر بە هێزەکانی پۆلیس نواندووە دۆسیەیان بۆ کراوەتەوە و دراونەتە دادگا. 
هاوکات ئەوانەی کە بە رێکخەری خۆپیشاندانەکان ناسراون، بە توندی ئەشكەنجە کراون و خراونەتە زیندانی تاکە کەسییەوە بەشێکیان ماوەی دوو رۆژ خواردن و خواردنەوەیان لێ بڕیون. 

بە جۆرێک یەکێک لەو چالاکوانانە لە ژێر ئەشکەنجە لە هۆش چووە و لە ترسی ئەوەی گیان لەدەستبدات ئازاد کراوە و لە رێگەی کەسوکارییەوە رەوانەی نەخۆشخانە کراوە کە تا ئێستاش لە ژێر چاودێری پزیشکیدایە. 

سەرچاوەیەک لە پۆلیسی دهۆک بە پرس میدیای راگەیاند دۆسیەی خۆپیشاندەرەکان لای ئاسایشەوە هیچ پرسێک بەوان نەکراوە، بەپێی زانیارییەکانی ئەو سەرچاوەیە تا ئێستا زیاتر لە ١٥ خۆپیشاندەر لە لای ئاسایشی دهۆک دەستبەسەرن و ئازاد نەکراون. 

لە زۆنی یەکێتی چی روویدا؟ 
یەکێتی لە میدیاکانیەوە پێشتر پشتیوانی خۆی بۆ خۆپیشاندانی هاوڵاتیان نیشاندەدا و بەپرسانی ئەو حزیبە بە توندی دژی هەر مامەڵەیەکی خراپ بوون لەگەڵ خۆپیشاندەران بەڵام لە دوای کۆبوونەوەکانی ئەم دواییەی وەفدی پارتی و لەگەڵ باڤڵ تاڵەبانی هاوسەرۆکی یەکێتی لە سلێمانی و هەولێر هەڵوێستی ئەو حزبە بەرانبەر بە خۆپیشاندەران گۆڕانی بەسەردا هات. 


بە تەنیا لە رانیە زیاتر لە ٥٠ خۆپیشاندەر دەستگیرکراون. 

لە قەزای رانییە ماوەی زیاتر لە ١٠ رۆژ خۆپیشاندانی هاوڵاتیان دژی سیستمی حوکمداری و گەندەڵی و دزی لە داهاتی گشتی بەڕێوەچوو هێزە ئەمنییەکانی یەکێتی کاردانەوەیان بەرانبەر خۆپیشاندان نەبوو تا ئەو کاتەی خۆپیشاندانەکان لە زاخۆ و دهۆک سەریان هەڵدا. 

بەپێی ئەو زانیاریانەی لەسەرچاوەیەکی ناو مەکتەبی سیاسی یەکێتی دەست پرس میدیا کەوتووە، پارتی بە فەرمی نیگەرانییەکانی خۆی لەو خۆپیشاندانانە گەیاندووە بە تایبەت لە مامەڵەکردنی هێزە ئەمنییەکانی یەکێتی لەگەڵ خۆپیشاندەران هەربۆیە هەڵمەتی دەستگیرکردنی خۆپیشاندەران دەستی پێکرد. 

بەپێی زانیارییەکان بە تەنیا لە قەزای رانییە زیاتر لە ٢٠٠ کەس دەستگیرکراون بەڵام دواتر لە ژێر فشاری کۆمەڵایەتیدا بەشێکی زۆریان ئازاد کراون و ئێستا نزیکەی ٥٠ خۆپیشاندەریان ماونەتەوە. 

لەوبارەوە نوێنەرایەتیی خۆپیشاندەرانی ناڕازی لە قەزای رانیە و دەروبەری لە ‏یاداشتێكدا رایدەگەیێنن، لە چەند رۆژی رابردوودا بەهۆی خۆپیشاندنەكانەوە ‏بەبێ فەرمانی دادگا نزیكەی 50 كەسیان دەستگیركراوە‌، لە یاداشتەکەدا هاتووە داوا دەكەن لە ‏ماوەی 72 كاژێردا سەرجەم گیراوەكانیان بەبێ‌ مەرج ئازاد بكرێن.‏ 

بەڵام شۆڕش ئیسماعیل وتەبێژی پۆلیسی ئیدارەی ‏راپەڕین بە پرسی میدیای وت ئەو ژمارەیەی لە یاداشتی خۆپیشاندەراندا هاتووە دروست نییە بەڵکو تەنها ١٢ کەس دەستگیرکراون ئەوەش بە فەرمانی دادگا ئەنجامدراوە. 

هەڵوێستی رێکخراوە نێودەوڵەتییەکان
سەرکوتکردنی خۆپیشاندەران لە هەرێمی کوردستان ناڕەزایی رێکخراوە نێودەوڵەتییەکانی لێکەوتووەتەوە، جێنین هێنیس پلاسخارت، نوێنەری نێردەی نەتەوەیەکگرتووەکان بۆ عێراق لە کۆبوونەوەی ئەنجوومەنی ئاسایشی نێودەوڵەتی لەبارەی ئازادیی رادەربڕین و چاکسازییە بنەڕەتییەکان لە عێراق رایگەیاند، "جێگەی ئەوپەڕی نیگەرانییە کە کوشتن و کردنەئامانجی چالاکڤانان و بەرگریکارانی مافەکانی مرۆڤ زیادیکردووە".

وتیشی"پێویستە جارێکی دیکە ئەمڕۆ ئەو پەیامە دووبارەبکەمەوە، ئەوەی روونە کە کاردانەوەی تووند هەیە لە بەرامبەر رەخنەی گشتی، ناڕەزایی و تەنگپێهەڵچنین، یان داخستنی دەزگاکانی راگەیاندن، رێگەیەک نین بۆ بەرەوپێشچوون".

ليست هناك تعليقات:

إرسال تعليق

بابەتی پەیوەندی دار

إعلان اسفل المشاركات

ماڵپەڕی پرس میدیا

بەشە سەرەکیەکان

دواین هەواڵ

نموذج الاتصال

الاسم

بريد إلكتروني *

رسالة *

پرس میدیا - Prs Media

پرس ، دامە زراوەیەکی میدیایی پیشەیی ئازادە دەبێتە بڵند گۆ و ئاوێنەی دەنگ و ڕەنگە جیاوازە نەبیستراو و نەبینراوەکان کلتور و فەرهەنگ و هــونــەری نــیـشـتـمـانیـی دەپـارێـزێـت و خـــەمـــی هـەمـیـشەی چەسپاندنی ئاشتی کۆمەڵایەتی و پێکەوە ژیان دەبێت ، پرس میدیا مەبەستیەتی نـەوەی ئـێسـتـاو داهـاتـوی نـیـشـتـمان بە ئاگابێت لـەسـەرجــەم پـرس و پـێشهاتەکانی دەوروبەری دەیەوێت بەزمانێکی بابەتیانە ئەو نەوەیە بدوێنێت

2019 - PRSMEDIA.NET / ALL RIGHT RESERVED ©