"ئاستی توندوتیژی بەرانبەر بە ژنان لە هەرێمی کوردستان هێشتا زۆر بەرزە" - پرس میدیا

إعلان فوق المشاركات

"ئاستی توندوتیژی بەرانبەر بە ژنان لە هەرێمی کوردستان هێشتا زۆر بەرزە"

"ئاستی توندوتیژی بەرانبەر بە ژنان لە هەرێمی کوردستان هێشتا زۆر بەرزە"

پرس میدیا - راپۆرت
لەگەڵ ئەوەی ئامارەکانی کوشتنی ژنان لە نۆ مانگی سەرەتای ئەمساڵ بەراورد بە ساڵی رابردوو دابەزیون بەڵام هیشتا ئاستی توندوتیژی بەرانبەر بە ژنان لە هەرێمی کوردستان بەرزن. 

بەپێی ئامارەکانی بەڕێوەبەرایەتیی گشتیی بەرەنگاربوونەوەی تووندوتیژی دژ بە ئافرەتان و خێزان لە ماوەی 9 مانگی سەرەتای ئەمساڵدا تەنیا چوار رووداوی کوشتنی ئافرەتان لە هەرێمی کوردستان تۆمارکراون، بەڵام لە 9 مانگی سەرەتای 2019دا 30 رووداوی کوشتنی ئافرەتان لە هەرێمی کوردستان تۆمارکراوە. 

هەروەها لە ماوەی 9 مانگی سەرەتای ئەمساڵدا 32 رووداوی خۆسووتاندنی ئافرەتان تۆمارکراوە، بەڵام لە 9 مانگی سەرەتای 2019دا 81 رووداوی خۆسووتاندنی ئافرەتان لە هەرێمی کوردستان تۆمارکراون. 

لەگەڵ ئەوەی ئامارەکانی بەڕێوەبەرایەتیی گشتیی بەرەنگاربوونەوەی تووندوتیژی دژی ژنان ورد و دروست نین بەڵام بەراورد بە ساڵی ڕابردوو دابەزینی بەرچاوی بەخۆیەوە بینوە. 

بەوپێیەی تەواوی حاڵەتەکانی مردنی ژنان بە کوشتن یان توندوتیژی تۆمار ناکرێن و دەبەسترێنەوە بە ڕووداوی سروشتی و مردنی ئاساییەوە، لەگەڵ ئەوەشدا بەشێکی کەمی ئەو توندوتیژییانە لای لایەنە پەیوەندیدارەکان تۆمار دەکرێن ئەوەش بەهۆی ترسی ژنانە لە دەرەنجامەکانی. 

جەمال محەمەد توێژەری کۆمەڵایەتی بە پرسی وت، پرسی توندوتیژی بەرانبەر بە ژنان بابەتێکی نوێ نییە، بە درێژایی مێژووی مرۆڤایەتی ئەو پرسە هەبووە و لە کۆمەڵگایەکەوە بۆ کۆمەڵگایەکی تر جیاوازی هەیە. 

بە بڕوای ئەو توێژەرە بەشێکی زۆری ئەو توندوتیژیانەی بەرانبەر بە ژنان لە هەرێمی کوردستان ئەنجام دەدرێن بەهۆی لاوازی ئاستی رۆشنبیری خێزان و قەیرانە درووستکراوەکانەوەیە. 

ئەو دەڵێت توندوتیژی تەنها بریتی نییە لە کوشتن بەڵکو هەڵوەشانەوەی خێزانەکان و جێهێشتنی ژنان لەم بارودۆخە سەختەدا هیچی لە کوشتن کەمتر نییە. 

سروشت عومەر چالاکوانێکی مەدەنییە، ئەو ڕەخنەی توند لە رێکخراوەکانی تایبەت ژنان دەگرێت و پێی وایە تەنیا ئامانجی حیزبی و تایبەتیان هەیە کار بۆ دۆسیەکان تایبەت بە ژنان ناکەن.

ئەو دەڵێت دەیان ژن بە شێوازی مەترسیدار کوژراون ئەو رێکخراوانە نەیانتوانیوە کاریگەری لەسەر لایەنە پەیوەندیدارەکان بکەن، ئەو کوشتنی کچێکی قەزای کەلار بە نمونە دەهێنێتەوە کە لەم هەفتەیەدا لەلایەن سێ برایەوە خنکێنراوە، کە رێکخراوەکانی ژنان لە ئاستیدا بێدەنگ بوون.

سرووشت دەڵێت هیچ کات ئامادە نیم کار لەگەڵ ئەو جۆرە رێکخراوانە بکەم بەو پێیەی ئەوان ئامانجیان بەرژەوەندی تایبەتی و حیزبییە.

نەتەوەیەکگرتووەکان، رۆژی ٢٥ی تشرینی دووەمی هەموو ساڵێکی وەک رۆژی جیهانی بەرەنگاربوونەوەی توندوتیژی دژ بە ژنان دەستنیشانکردووە، ساڵانە لە زۆربەی وڵاتانی جیهان دوو هەفتە چالاکی بۆ کەمکردنەوەی ئاستی توندوتیژییەکان بەرانبەر ژنان بەڕێوەدەچێت. 

ئەمساڵ سکرتێری گشتیی نەتەوە یەکگرتووەکان کەمپەینێکی بۆ کۆتاییهێنان بە تووندوتیژی دژ بە ژنان دەستپێکردووە، بۆ ماوەی 16 رۆژ بەردەوام دەبێت. 

دروشمی ئەمساڵی کەمپەینەکەی نەتەوەیەکگرتووەکان ناونراوە "جیهان پرتەقاڵی بکەن: پاڵپشتی دارایی بخەنەڕوو، وەڵامبدەنەوەو رێگری بکەن و زانیاریی کۆبکەنەوە". 

بەپێی ئاماری نەتەوەیەکگرتووەکان 35٪ی ژنانی جیهان لانیکەم جارێک رووبەڕووی تووندوتیژی جەستەیی، سێکسی، خێزانی یاخود لە دەرەوەی خێزان بوونەتەوە. 

هەروەها هاتووە رۆژانە 137 ژن لەلایەن ئەندامێکی خێزانەکەیان دەکوژرێن، ئەوەش زیاتر بە پاساوی نامووس پەرستی ڕوودەدات. 

لە ئامارەکەی نەتەوەیەکگرتووەکاندا هاتووە تەنها ٪٤٠ی ژنان کە دووچاری تووندوتیژی دەبنەوە، داوای یارمەتی دەکەن ٪٦٠ بەهۆکاری جیا جیا توندوتیژییەکان دەشارنەوە یان تانانەت هۆشیاری ئەوەیان نییە چۆن سكاڵا لەلایەنی پەیوەندیدار تۆمار بکەن. 

No comments:

Post a comment

بابەتی پەیوەندی دار

إعلان اسفل المشاركات

ماڵپەڕی پرس میدیا

بەشە سەرەکیەکان

دواین هەواڵ

Contact form

Name

Email *

Message *

پرس میدیا - Prs Media

پرس ، دامە زراوەیەکی میدیایی پیشەیی ئازادە دەبێتە بڵند گۆ و ئاوێنەی دەنگ و ڕەنگە جیاوازە نەبیستراو و نەبینراوەکان کلتور و فەرهەنگ و هــونــەری نــیـشـتـمـانیـی دەپـارێـزێـت و خـــەمـــی هـەمـیـشەی چەسپاندنی ئاشتی کۆمەڵایەتی و پێکەوە ژیان دەبێت ، پرس میدیا مەبەستیەتی نـەوەی ئـێسـتـاو داهـاتـوی نـیـشـتـمان بە ئاگابێت لـەسـەرجــەم پـرس و پـێشهاتەکانی دەوروبەری دەیەوێت بەزمانێکی بابەتیانە ئەو نەوەیە بدوێنێت

2019 - PRSMEDIA.NET / ALL RIGHT RESERVED ©